Հայաստանի արհմիությունների կոնֆեդերացիան, որպես սոցիալական գործընկեր, ցուցաբերեց համագործակցային մոտեցում արցախահայերին աջակցության հարցերում. ՀՀ աշխատանքի և սոցիալական հարցերի նախարարի տեղակալ Ռուբեն Սարգսյան
Հայաստանի արհմիությունների կոնֆեդերացիայի (ՀԱՄԿ) նախաձեռնությամբ և Աշխատանքի միջազգային կազմակերպության աջակցությամբ 2023 թվականի նոյեմբերի 23-ից 24-ը Ծաղկաձորում տեղի ունեցավ «Արհմիության ռազմավարությունը Արցախից բռնի տեղահանված բնակչությանը ՀՀ աշխատաշուկա ինտեգրվելուն» թեմայով աշխատաժողով, որին մասնակցում էին ՀԱՄԿ-֊ի նախագահը, նախագահի տեղակալները, ՀԱՄԿ-ին անդամակցող ճյուղային հանրապետական միությունների (ՃՀՄ) նախագահները և ՀԱՄԿ-ի աշխատակազմը։
ՀԱՄԿ-ի նախագահ Էլեն Մանասերյանի հրավերով աշխատաժողովին մասնակցում էին ՀՀ աշխատանքի և սոցիալական հարցերի նախարարի տեղակալ Ռուբեն Սարգսյանը, ՀՀ աշխատանքի և սոցիալական հարցերի նախարարության միասնական սոցիալական ծառայության զբաղվածության ապահովման և աշխատանքային ներուժի զարգացման վարչության գործատուների հետ համագործակցության և աշխատանքային միգրացիայի բաժնի պետ Հրայր Հակոբյանը, ՀՀ առողջապահական և աշխատանքի տեսչական մարմնի աշխատանքային օրենսդրության վերահսկողության վարչության աշխատողների առողջության պահպանման և անվտանգության ապահովման վերահսկողության բաժնի պետ Աշոտ Հարությունյանը, ՀՀ աշխատանքի և սոցիալական հարցերի նախարարության աշխատանքի և զբաղվածության վարչության զբաղվածության բաժնի մասնագետ Լիանա Համբարձումյանը:
Էլեն Մանասերյանն անդրադարձավ ՀԱՄԿ-ի և ՀԱՄԿ-ի անդամ ՃՀՄ-ների կողմից կատարված հումանիտար ծրագրերին և արցախահայերին ՀՀ աշխատաշուկա ինտերգրելու հարցերին:
Հրավիրվածները ներկայացրեցին պետության կողմից Արցախից բռնի տեղահանված անձանց համար իրականացված ծրագրերը, որին հաջորդեց հարցուպատասխան և քննարկում:
Աշխատաժողովի երկրորդ մասում ՃՀՄ նախագահների մասնակցությամբ մշակվեց Արցախից բռնի տեղահանված բնակչությանը ՀՀ աշխատաշուկա ինտեգրման ռազմավարությունը:
