2024թ. մաիսի 30-ին՝ ժամը 14:00 – 16:00 –ը, ՀԱՄԿ-ի շենքի՝ միջոցառումների անցկացման թիվ 808 սրահում տեղի ունեցավ Հայաստանի մշակույթի աշխատողների Ճյուղային արհմիության կողմից կազմակերպված ընդունելություն ‹‹Թանգարանների միջազգային օր›› մասնագիտական տոնի առթիվ: Ընդունելությանը մասնակցում էին Ճյուղային արհմիությանն անդամակցող թանգարանների՝ 2023 թվականին ‹‹լավագույն աշխատող›› ճանաչված արհմիության անդամները, արհկոմների նախագահներ, գործկոմի անդամներ: Միջոցառմանը հրավիրված էր և մասնակցում էր նաև ՀԱՄԿ-ի նախագահ տկն Էլեն Մանասերյանը:
Բացման խոսքում Ճյուղային հանրապետական միության նախագահ Էսմա Սիմոնյանը ողջունեց ներկաներին, խոսեց այս տոնի ստեղծման պատմության, նշանակության, կարևորության և ամենամյա այս միջոցառման կազմակերպման նպատակների և դերի մասին: Նշեց, որ ՃՀՄ-ի միջոցառումը յուրաքանչյուր նախորդ տարվա ընթացքում թանգարանների ձեռքբերումների յուրօրինակ ամփոփումն է, աշխատողների գնահատումն ու խրախուսումը: Թանգարանների արհկոմների և տնօրինությունների համատեղ որոշումների հիման վրա Ճյուղային հանրապետական միության պատվոգրով պարգևատրման են ներկայացվում նախորդ տարվա լավագույն աշխատողները, որոնց շնորհիվ է նաև, որ այս տարի ևս միջազգային այս տոնին մասնակցող հանրապետության արդեն 118 թանգարանները մայիսի 18-ը և համաեվրոպական ‹‹թանգարանների գիշեր›› միջոցառումը միջազգային այս տոնը գնալով վերածում են գրեթե համաժողովրդական տոնի:
Ընդունելության մասնակիցներին ողջունեց և տոնի կապակցությամբ շնորհավորեց ՀԱՄԿ-ի նախագահ տկն Է. Մանասերյանը: Նա դիմեց ներկաներին՝ ասելով, որ Հայաստանի արհմիությունները փորձում են ամեն ինչ անել ՝ լուծելու աշխատողներին հուզող բոլոր հարցերը՝ սոցիալական, իրավական, աշխատանքային և այլն: Նախագահը անդրադարձավ նաև հեղեղումների հետևանքով հանրապետությունում ստեղծված աղետի գոտուն. խոսեց կամավորականների միջոցով ցուցաբերվող օգնության մասին:
Այնուհետև տեղի ունեցավ պարգևատրման հանդիսավոր արարողություն. Հայաստանի մշակույթի աշխատողների արհեստակցական կազմակերպությունների Ճյուղային հանրապետական միության պատվոգրերով և տոնական նվերներով պարգևատրվեցին Երևանի, Վանաձորի, Գեղարքունիքի թանգարանների՝ նախորդ տարվա ‹‹լավագույն աշխատող›› ճանաչված արհմիության անդամները:
Միջոցառումն ավարտվեց ֆուրշետի սեղանի շուրջ փոխադարձ շնորհավորանքներով, բարձր տրամադրության, ջերմ և տոնական մթնոլորտում:
