Արժանապատիվ աշխատանքը յուրաքանչյուր մարդու արդար վարձատրության, առողջ և անվտանգ աշխատանքային պայմանների, սոցիալական պաշտպանության և աշխատանքային իրավունքների համալիր իրականացման երաշխիքն է։ Ցավոք, Հայաստանի Հանրապետությունում աշխատանքային իրավահարաբերություններն ու սոցիալական գործընկերությունը հեռու են լիարժեք լինելուց։
Աշխատողը մշտապես բախվում է հոգեբանական, երբեմն էլ նաև ֆիզիկական բռնությունների։ Աշխատանքը կորցնելու մշտական վախի մթնոլորտը հեռու է առողջ և արժանապատիվ լինելուց։
Սոցիալական արդարությունը շատ դեպքերում երազանք է...
Հոկտեմբերի 7-ը օրացույցում առանձնացնելով` ևս մեկ անգամ (թեպետ ամեն օր էլ) բարձրաձայնում ենք աշխատանքային իրավահարաբերություններում խնդիրների մասին։
Օրենսդրությունը կարող է լավը լինել, համապատասխանել միջազգային փաստաթղթերին, սակայն կարևոր է դրա կիրարկումն ու իրավակիրառ պրակտիկան։
Աշխատող մարդը յուրաքանչյուր պետության տնտեսական հզորացման անկյունաքարն ու հիմքն է։
Խնդիրները լուծելու առավել լավ տարբերակ, քան սոցիալական գործընկերությունն է, միջազգային հանրությունը դեռ չի գտել, ուստի ևս մեկ անգամ կոչ ենք անում ՀՀ կառավարությանը կայացնել ու զարգացնել սոցիալական գործընկերությունը ՀՀ- ում, դրանով իսկ նպաստելով մեր քաղաքացիների սոցիալական և անվտանգային խնդիրների լուծմանը։
