Սիրելի՛ հայրենակիցներ,

 Անցնող տարին դժվար էր ու փորձություններով լի, որն արմատապես փոխեց մեր կյանքը, և հերթական անգամ խլեց հարյուրավոր մարդկային կյանքեր: Սակայն մեզ պատուհասած խնդիրներն ու հոգսերը չեն կարող խաթարել մեզ միավորող բարության և հոգատարության մթնոլորտը, որոնք ստիպում են գիտակցել համախմբվածության և փոխըմբռնման անհրաժեշտությունը:

Չնայած բոլոր դժվարություններին՝ Հայաստանի արհմիությունների կոնֆեդերացիան շարունակել է ակտիվորեն աշխատել աշխատողների իրավունքների և շահերի պաշտպանության ուղղությամբ՝ առավելագույնս օգտագործելով սոցիալական գործընկերության մեխանիզմները:

 2023 թվականի ընթացքում Հայաստանի արհմիությունների կոնֆեդերացիան իրավաբանական աջակցություն է ցուցաբերել շուրջ 540 աշխատողների, ավելի քան 450 արհմիութենականներ մասնակցել են դասընթացների, ունեցել ենք հաղթած դատական գործեր: Հայաստանի արհմիությունների կոնֆեդերացիան իր համեստ ներդրումն ունեցավ նաև մեր համազգային դժվարությունները հաղթահարելու գործում:

 Իրավամբ, անցնող տարին մեզ բազմաթիվ հուսահատ իրավիճակներ բերեց, բայց համոզված եմ, որ մենք միասին և արժանապատվորեն հաղթահարելու ենք այս փորձությունը:

 Այսօր, առավել քան երբևէ, միասին պիտի արարենք հանուն Հայաստանի Հանրապետության՝ ապահովելով արժանապատիվ աշխատանքային միջավայր՝ որպես սոցիալական բարեկեցության երաշխիք:

 Սիրելինե՛րս, սրտանց շնորհավորում եմ բոլորիդ Ամանորն ու Սուրբ Ծնունդը՝ մաղթելով խաղաղություն, սեր և ջերմություն բոլորիդ ընտանիքներում:

Հայաստանի արհմիությունների կոնֆեդերացիայի նախագահ
Էլեն Մանասերյան