Շուրջ 200 միլիոն աշխատակիցների շահեր ներկայացնող ավելի քան 1000 արհմիություններ 130 երկրներից հավաքվել են Ավստրալիայի Մելբուրն քաղաքում՝ մասնակցելու աշխատողների համաշխարհային պառլամենտին:
Արհմիությունների միջազգային կոնֆեդերացիայի կոնգրեսը 4 տարին մեկ հավաքում է 300-ից ավելի ազգային արհմիություններ՝ միասին քննարկելու արհմիությունների համաշխարհային օրակարգը։
Քննարկումներն ընթանում են սոցիալական գործընկերության պայմանագրին առնչվող մի շարք թեմաների շուրջ՝ բարենպաստ կլիմայական պայմանների ապահովում, աշխատողների իրավունքներ, աշխատավարձեր, սոցիալական ապահովություն, հավասարություն և ներառականություն։
Բացման ընթացքում տարբեր երկրների ներկայացուցիչներին ողջունեցին Արհմիությունների միջազգային կոնֆեդերացիայի նախագահ Այուբա Վաբբան (Նիգերիա), Ավստրալիայի կոնֆեդերացիայի նախագահ Միշել Օնեյլը և քարտուղար Սելի Մքմանուսը։
«Մենք պայքարի մեջ ենք աշխատողների արժանապատիվ կյանքի համար․․․ Անչափ ոգևորիչ է այստեղ հավաքվածների և միջազգային արհմիութենական շարժման էներգիան»։
Կոնգրեսում քննարկվելու են Արհմիությունների միջազգային կոնֆեդերացիայի քաղաքականությունը գլոբալ իրավիճակի համատեքստում, ինչպես նաև ժամանակակից տեխնոլոգիաների, կլիմայական փոփոխությունների ազդեցությունը աշխատանքի վրա, ներառականությունն ու անցումային ժամանակաշրջանի մարտահրավերները։
Կոնգրեսը ավարտվելու է Նոյեմբերի 22-ին։ Ընթացքին կարելի է հետևել այստեղ, ինչպես նաև #ITUC22 հեշթեգով սոցիալական ցանցերում։
