Նոյեմբերի 24-ին Երևանի Holiday Inn հյուրանոցում տեղի ունեցավ համավարակի ազդեցությունը ՀՀ-ում զբաղվածության վրա. արհմիությունների խնդիրը ոչ ֆորմալ տնտեսության աշխատողների արժանապատիվ աշխատանքի ապահովման ճանապարհին> ուսումասիրության արդյունքների շուրջ քննարկում: Ուսումնասիրությունը, որը կատարվել է Հայաստանի արհմիությունների կոնֆեդերացիայի կողմից Աշխատանքի միջազգային կազմակերպության աջակցությամբ, իրականացվել է <Ոչ ֆորմալ զբաղվածությունը, ոչ ստանդարտ աշխատանքային պայմանագրերը, ինքնազբաղվածությունը և պլատֆորմային զբաղվածությունն էապես ներառող Հայաստանի Հանրապետության տնտեսության ոլորտներում աշխատանքային հարաբերությունների և պայմանների իրավական և գործնական միջավայրի վրա համաճարակի ազդեցության վերլուծություն > ծրագրի շրջանակներում: Հետազոտությունը կատարել է անկախ փորձագետ Ռուբեն Մարկոսյանը:
Միջոցառմանը մասնակցում էին ՀԱՄԿ-ի նախագահ Էդուարդ Թումասյանը, ՀԱՄԿ-ի նախագահի տեղակալ Բորիս Խարատյանը, ՀԱՄԿ-ի անդամ ճյուղային միության նախագահներ, ՀԱՄԿ-ի աշխատակազմի ներկայացուցիչներ, ՀԱՄԿ-ի երիտասարդական խորհրդի նախագան ու անդամներ, <Համերաշխության կենտրոն> հայաստանյան մասնաճյուղի տնօրեն Տետիան Սոլոդովնիկը, ծրագրի ղեկավար Մարիամ Չիբուխչյանը:
Քննարկմանը տեսակապով մասնակցում էին նաև Աշխատանքի միջազգային կազմակերպության Արևելյան Եվրոպայի և Կենտրոնական Ասիայի երկրների գրասենյակի և արժանապատիվ աշխատանքի տեխնիկական աջակցության խմբի աշխատավորների գործունեության մասնագետ Գոչա Ալեքսանդրիան, ԱՄԿ ազգային համակարգող Նունե Հովհաննիսյանը:
Միջոցառումը վարում էր ՀԱՄԿ-ի Ուսումնակազմակերպչական կենտրոնի ղեկավար Էլեն Մանասերյանը:
Ռուբեն Մարկոսյանն իր ելույթում ներկայացնելով ուսումնասիրության արդյունքները, նշեց, որ այդ ընթացքում դիտարկվել են սոցիալական գործընկերության և արհմիութենական շարժման մարտահրավերները, ուսումնասիրվել են ոչ ֆորմալ զբաղվածության ֆորմալացման հնարավորությունները, ներկայացվել է արդի պայմաններում լայն տարածում գտած առցանց աշխատանքային հարթակների զբաղվածության էությունը, առանձնահատուկ շեշտադրվել են այդ հարթակների աշխատողների արժանապատիվ աշխատանքի հիմնախնդիրները:
Բանախոսը կարևորեց աշխատանքի և սոցիալական հարցերի ազգային եռակողմ հանձնաժողովի քննարկման համար մշակված առաջարկությունները, որոնց թվում են՝ սոցիալական գործընկերության զարգացման, եռակողմ հանձնաժողովի գործունեության արդյունավետության բարձրացման, արհմիութենական շարժման զարգացման, անկայուն և ոչ ֆորմալ զբաղվածության խնդիրների կանոնակարգման վերաբերյալ, ինչպես նաև ՀԱՄԿ-ի քննարկմանը ներկայացվող համապատասխան խմբերի աշխատողների սոցիալական ապահովության և արհմիութենական ներկայացվածության խթանման ռազմավարությունը: Այդ առումով Ռ.Մարկոսյանն առաջարկեց իրականացնել հանրային իրազեկման արշավ:
Ողջունելով քննարկման մասնակիցներին Գոչա Ալեքսանդրիանն իր խոսքում նշեց հայաստանյան արհմիությունների առջև առկա մարտահրավերներն ու դրանց հաղթահարման անհրաժեշտությունը, ինչը կնպաստի թե՛ արհմիության անդամների թվաքանակի աճին և թե՛ արհմիությունների հզորացմանը:
