2022թ. օգոստոսի 14-ին ՀԱՄԿ-ի և «Solidarity Center» («Համերաշխության կենտրոն») հայաստանյան գրասենյակի աջակցությամբ ՀԱՄԿ-ի երիտասարդական հանձնաժողովի անդամները, «Իրազեկում և փորձի փոխանակում» ծրագրի շրջանակներում այցելեցին Հրազդան խոշորացված համայնք՝ տեղի երիտասարդների հետ հանդիպման նպատակով (2022 թ. Հրազդան քաղաքը ՀՀ-ում հռչակվել է տարվա երիտասարդ քաղաք):
ՀԱՄԿ-ի երիտասարդական հանձնաժողովի անդամները Հրազդանի խոշորացված համայնքում հանդիպեցին տարբեր նախասիրություններ ունեցող ուսանողների և աշխատող երիտասարդների հետ։ Հրազդանի Շ. Ազնավուրի անվան այգում տեղի ունեցած հանդիպման ժամանակ երիտասարդ արհմիութենականները Հրազդանի Ինֆո տան ուսանողներին և երիտասարդներին մանրամասնորեն ներկայացրին արհմիությունների գործունեությունը և նպատակները, կիսվեցին իրենց արհմիութենական փորձով և այդ ամենը երիտասարդների մոտ ամրապնդելու համար կազմակերպեցին արհմիության վերաբերյալ խաղ։
Հանդիպման ժամանակ նաև տեղի ունեցավ քննարկում, որի ընթացքում երիտասարդ արհմիութենականները պատասխանեցին Հրազդանի Ինֆո տան երիտասարդներին հուզող հարցերին:
