Երևան, 14.12.2019
naxagah

ՀԱՐԳԵԼԻ ԲԱՐԵԿԱՄ

Ողջունում եմ Ձեզ Հայաստանի արհմիությունների կոնֆեդերացիայի ինտերնետային կայքում:

Էլեկտրոնային հաղորդակցության այս միջոցը հրաշալի հնարավորություն է արհմիությունների գործառույթներին, իրականացվող ծրագրերին և միջոցառումներին տեղեկանալու և հետադարձ կապի միջոցով մասնակցային գործընթաց ապահովելու համար: Մեր կայքում Դուք կգտնեք անհրաժեշտ տեղեկություններ աշխատողի շահերի պաշտպանությանն առնչվող օրենսդրական, իրավական ակտերի ու նախագծերի մասին: Էլեկտրոնային ընդունարանը հնարավորություն կտա Ձեզ հետաքրքրող հարցերի վերաբերյալ ուղարկել դիմումներ և ստանալ պատասխաններ: Հուսով եմ, որ մեր կայքն իր մատչելիությամբ և ժամանակակից գործիքներով կդառնա տեղեկատվական լավագույն աղբյուր բոլոր օգտագործողների համար:

Հայաստանի արհմիությունների կոնֆեդերացիայի նախագահ՝ Է. Թումասյան

Կայքի հին տարբերակը

05 Օգոստոս, 2019

Կայացավ Հանրապետական եռակողմ հանձնաժողովի հերթական նիստը

Կայացավ Հանրապետական եռակողմ հանձնաժողովի հերթական նիստը

 ՀՀ աշխատանքի և սոցիալական հարցերի նախարարությունում հուլիսի 31-ին կայացավ Հանրապետական եռակողմ հանձնաժողովի հերթական նիստը, որին մասնակցում էին Հայաստանի արհմիությունների կոնֆեդերացիայի, Հայաստանի գործատուների միության և ՀՀ կառավարության ներկայացուցիչներ:    Նիստում քննարկման էր դրված <Հայաստանի Հանրապետության...

24 Հուլիս, 2019

ՑԱՎԱԿՑՈՒԹՅՈՒՆ

 

2019 թվականի հուլիսի 23-ին ծանր հիվանդությունից մահացել է ՀԱՄԿ-ի Կազմակերպաուսումնական կենտրոնի ղեկավար, Բուհերի արհեստակցական կազմակերպությունների ճյուղային հանրապետական միության նախագահ Գառնիկ Արիստակեսի Վաղարշակյանը:

Հայաստանի արհմիությունների կոնֆեդերացիան իր խորին ցավակցությունն ու զորակցությունն է հայտնում Գառնիկ Վաղարշակյանի ընտանիքին, հարազատներին և ընկերներին նրա վաղաժամ մահվան կապակցությամբ:

Իր մարդկային արժանիքներով, հայ մանկավարժի ու մտավորականի ճշմարիտ կեցվածքով ու արհեստավարժությամբ Գառնիկ Վաղարշակյանն օրինակ է հանդիսացել շատ շատերի համար։ Հաճախակի հրապարակվող հոդվածներում նա իր անաչառ գնահատականն ու դիրքորոշումն է հայտնել հասարակական հնչեղություն ունեցող ցանկացած իրադարձության վերաբերյալ:

Գառնիկ Վաղարշակյանն իր ակտիվ ու սկզբունքային դիրքորոշմամբ մշտապես եղել է արհմիությունների դերի ու հեղինակության բարձրացմանը նպաստող գործունեության կիզակետում, իր լուման ներդրել կրթական ոլորտում սկզբնական արհմիութենական կազմակերպությունների ձևավորման գործընթացում: Նրա կազմակերպչական ու ոգեշնչող ջիղը եղել է արհմիության շարքերում երիտասարդության ներգրավման գրավականը:

Գառնիկ Վաղարշակյանը ծնվել է 1951 թ. դեկտեմբերի 12-ին:

1968-1972 թթ. սովորել և ավարտել է Խ.Աբովյանի անվան պետական մանկավարժական ինստիտուտի մաթեմատիկայի բաժինը:

1972-1973 թթ. ծառայել է Խորհրդային բանակում:

1974-1977թթ. աշխատել է Երևան քաղաքի տարբեր կրթօջախներում` դասավանդել է մաթեմատիկա դպրոցում, պրոֆտեխուսումնարանում, տեխնիկումում, բուհում:

1977-1991թթ. աշխատել է ՀՀ բարձրագույն և միջնակարգ մասնագիտական կրթության նախարարությունում` զբաղեցրել է տարբեր պաշտոններ:

1991-1994թթ. ընտրվել է Հայաստանի բուհերի աշխատողների և ուսանողների արհեստակցական կազմակերպությունների ճյուղային հանրապետական միության փոխնախագահ:

1994-1997թթ. ընտրվել է որպես վերոգրյալ միության նախագահի պաշտոնակատար:

1997-2002թթ. ընտրվել է Հայաստանի բուհերի աշխատողների և ուսանողների արհեստակցական կազմակերպությունների ճյուղային հանրապետական միության նախագահ:

2002-ից հանդիսացել է Հայաստանի բուհերի արհեստակցական կազմակերպությունների ճյուղային հանրապետական միության նախագահ:

2012թ. նշանակվել է ՀԱՄԿ-ի պատասխանատու քարտուղար:

Հանդիսացել է Արհմիությունների համընդհանուր համադաշնության խորհրդի անդամ (ք.Մոսկվա):

ՀՀ վարչապետի որոշմամբ նշանակվել է Միջին կրթության ուսուցման զարգացման ազգային խորհրդի անդամ:

ՀՀ վարչապետի որոշմամբ նշանակվել է Ուսուցման ազգային հիմնադրամի հոգաբարձուների խորհրդի անդամ:

Ներկայացրել է Հայաստանի բուհերի արհեստակցական կազմակերպությունների ճյուղային հանրապետական միությունը Կրթության Ինտերնացիոնալի կազմում (ք.Բրյուսել):

Պարգևատրվել է ՀՀ Կրթության և գիտության նախարարի շնորհակալագրով, ԱՊՀ երկրների Կրթության և գիտության աշխատողների միջազգային արհմիութենական կազմակերպության պատվոգրով, ՀԱՄԿ-ի և ԱՊՀ երկրների Արհմիությունների համընդհանուր Համադաշնության պարգևներով:

Շուրջ 400 հրապարակումների և երկու գրքերի հեղինակ է:

Գառնիկ Վաղարշակյանն ամուսնացած էր, ուներ 3 զավակ և 6 թոռ:

Նրա անժամանակ մահը հիրավի մեծ կորուստ է ոչ միայն Հայաստանի արհմիությունների կոնֆեդերացիայի, այլև Բուհերի արհեստակցական կազմակերպությունների անդամների, նրան խորապես ճանաչողների ու գնահատողների համար:

18 Հուլիս, 2019

ՇՆՈՐՀԱՎՈՐԱՆՔ

ՀԱՆՔԱԳՈՐԾԻ ԵՎ ՄԵՏԱԼՈՒՐԳԻ ՕՐՎԱ ԱՌԹԻՎ

 

 Հուլիսի 21-ին Հայաստանի Հանրապետությունում նշվում է Հանքագործի և մետալուրգի օրը:

 Հայաստանի արհմիությունների կոնֆեդերացիան շնորհավորում է Հայաստանի լեռնագործների, մետաղագործների և ոսկերիչների արհեստակցական կազմակերպության ճյուղային հանրապետական միությանը, արհմիության անդամներին և համակարգի աշխատողներին մասնագիտական տոնի՝ Հանքագործի և մետալուրգի օրվա առթիվ, մաղթում հաջողություններ և նորանոր ձեռքբերումներ ոլորտի աշխատողների սոցիալ-տնտեսական խնդիրների, նրանց համար բարեկեցիկ պայմանների ապահովման գործում:

 Հանքարդյունաբերության ոլորտում զբաղված են հազարավոր աշխատողներ, ովքեր իրենց գործի նվիրյալն են և որոնց քրտնաջան աշխատանքի շնորհիվ հանքարդյունաբերությունը շարունակում է մնալ Հայաստանի տնտեսության ռազմավարական նշանակություն ունեցող ճյուղերից մեկը: Հարկ է նշել, որ ոլորտի աշխատողները պատվով են կատարում իրենց գործը:

 Հարգելի լեռնագործներ և մետալուրգներ, կրկին շնորհավորելով մասնագիտական տոնի առթիվ, մաղթում եմ ձեզ արժանապատիվ աշխատանք, հանուն որի Հայաստանի լեռնագործների, մետաղագործների և ոսկերիչների արհեստակցական կազմակերպության ճյուղային հանրապետական միությունը հետևողական ջանքեր է գործադրում, մաղթում եմ նաև առողջություն և բարեկեցություն` ձեզ և ձեր ընտանիքներին:

 

Հայաստանի արհմիությունների

կոնֆեդերացիայի նախագահ

Էդուարդ Թումասյան

21 Հունիս, 2019

18 Հունիս, 2019

Տեղի ունեցավ Աշխատանքի միջազգային համաժողովի 108-րդ նստաշրջանը

Տեղի ունեցավ Աշխատանքի միջազգային համաժողովի 108-րդ նստաշրջանը

2019թ. հունիսի 12-14-ը Ժնևում տեղի ունեցավ Աշխատանքի միջազգային համաժողովի 108-րդ նստաշրջանը, որը նվիրված էր ԱՄԿ-ի 100-ամյակին: Համաժողովը պատմական իրադարձություն է, այն կոչված է ամբողջ աշխարհի ուշադրությունը հրավիրել աշխատանքի բնագավառում տեղի ունեցող փոփոխություններին և այդ զարգացումներում ԱՄԿ-ի դերի բարձրացմանը: Նստաշրջանին մասնակցում...

14 Հունիս, 2019

ՀԱՄԿ-ի արձագանքը «Հայաստանի Հանրապետության աշխատանքային 
օրենսգրքում փոփոխություններ և լրացումներ կատարելու մասին» 
Հայաստանի Հանրապետության օրենքի նախագծի վերաբերյալ

 

 Հունիսի 13-ին https://www.e-draft.xn--am-1bd իրավական ակտերի նախագծերի հրապարակման միասնական կայքում Հայաստանի Հանրապետության տնտեսական զարգացման և ներդրումների նախարարության կողմից տեղադրվել է «Հայաստանի Հանրապետության աշխատանքային օրենսգրքում փոփոխություններ և լրացումներ կատարելու մասին» Հայաստանի Հանրապետության օրենքի նախագիծը:
 Օրենքի նախագծի մասին իր դիրքորոշումն է հայտնում ՀԱՄԿ-ի աշխատակազմի իրավաբանական բաժնի պետ Միքայել Փիլիպոսյանը:
 «Հայաստանի Հանրապետության աշխատանքային օրենսգրքում փոփոխություններ և լրացումներ կատարելու մասին» Հայաստանի Հանրապետության օրենքի նախագիծը առաջին անգամ մշակվել է 2017 թվականին, որի վերաբերյալ Աշխատանքի միջազգային կազմակերպությունը օրենքի նախագծի 14 հոդվածների վերաբերյալ տվել է բացասական գնահատական, նախագիծը համարելով անընդունելի: 
 2018թ. հունիսին կառավարության աշխատակազմում նախագիծը քննարկվել է շահագրգիռ կողմերի մասնակցությամբ, դարձյալ արժանանալով բացասական գնահատականի, քանի որ այն չի համասպատասխանում ՀՀ Սահմանադրության, ՀՀ աշխատանքային օրենսդրության, <Իրավական ակտերի մասին > ՀՀ օրենքի մի շարք հոդվածների: Իմ համոզմամբ, այս նախագիծը չի բխում աշխատողների շահերից, ավելին, այն անձի իրավական վիճակը վատթարացնող նախագիծ է: 
 Մինչդեռ https://www.e-draft.am կայքում տեղադրված վերոնշյալ նախագիծը դրվել է շրջանառության մեջ լրացուցիչ դրույթներով, որոնք իրավական առումով ավելի են բարդացնում աշխատողների վիճակը: Կարծում եմ, որ նախագիծը անընդունելի է և անօրինական, քանի որ հայտնի չէ նախագծի հեղինակը: Ներկայումս ՀՀ կառավարության կազմում գոյություն չունի տնտեսական զարգացման և ներդրումների նախարարություն:

05 Հունիս, 2019

Լրացուցիչ և հատուկ ընդմիջումներ

  Լրացուցիչ և հատուկ ընդմիջումները տրվում են աշխատանքային օրվա ընթացքում հանգստանալու համար՝ հաշվի առնելով աշխատանքի պայմանները: Լրացուցիչ և հատուկ ընդմիջումները տրվում են, եթե աշխատանքն կատարվում է +40 աստիճան ցելսիուսից բարձր կամ -10 աստիճան ցելսիուսից ցածր օդի ջերմաստիճանային պայմաններում: 
  Բացի դրանից, հիշյալ ընդմիջումները տրամադրվում են նաև ծանր ֆիզիկական կամ մտավոր հուզական գերլարված բնույթ կրող կամ առողջության համար բացասական ներգործություն ունեցող վտանգավոր այլ պայմաններում կատարած աշխատանքների դեպքում: 
  Լրացուցիչ և հատուկ ընդմիջումները տրվում են նաև մինչև 18 տարեկան աշխատողներին, եթե օրվա աշխատաժամանակի տևողությունը գերազանցում է 4 ժամը: Այդ ընդմիջման նվազագույն տևողությունը չի կարող պակաս լինել 30 րոպեից: 
  Լրացուցիչ և հատուկ ընդմիջումները ներառվում են աշխատաժամանակում: Այդ ընդմիջումների տրամադրման կարգը սահմանվում է կազմակերպության ներքին կարգապահական կանոններով, աշխատանքի ժամանակացույցով, կոլեկտիվ կամ աշխատանքային պայմանագրերով, իսկ այդ ընդմիջումների քանակը, տևողությունը և հանգստանալու տեղը նախատեսվում են կոլեկտիվ կամ աշխատանքային պայմանագրերով:
  Հարկ ենք համարվում նշել, որ հատուկ և լրացուցիչ ընդմիջումները տրամադրվում են անկախ սնվելու և հանգստանալու համար տրվող ընդմիջումներից:

 

  ՀԱՄԿ-ի աշխատակազմի իրավաբանական բաժին